Kulinarische Ustusch mit de Chinder
Ich döff mich zu dene Glückliche zähle, wo finanziell durch es Stipendium vo de MECATOR Stiftig unterstützt wird in mim Volontariat. Durch das Stipendium han ich d'Ufgab becho, mit de Chind es Projekt ufzbaue und eh dene 8 Mönet um z'setze.
Die wo mich guet kännet, wüsset wie gern ich eh de Chuchi stoh, choche und bache.
Min Plan isch eigentlich gsi, de Chinder viel über d'Ernährig bi z'bringe und mit ihne z'choche. Das isch theoretisch sehr guet planbar, praktisch aber chli schwieriger um z'setze und chum planbar.
Immer am Donnstig chunnt en Lastwage vom Supermaxi (wie Migros oder Coop bi eus) und bringt sehr viel Lebensmittel, wo churz vorem ablaufe sind oder abglofe sind, aber halt immerno essbar, aber nümm für de Verchauf. Denn wird gnau plant, wenn was kochet wird für die nechst Wuche und finanziell sind halt au kei grossi Gümpf möglich. Zudem wird eh de Nacht immer für de nechst Tag kochet, well das de einzig Moment isch, wo mer Rueh het, well alli (die meiste) pfuset.
Drum han ich min Plan denn chli gänderet und mich entschide, verschiednigi "Schwizerspezialitäte / Traditione" mit de Chinder z'mache:
Läbchueche
Eh liebi Fröndin, wo em Juli au noch Ecuador greist isch us de Schwiz, het mer es Läbchuechegwörz metbrocht….. Somit hani denn diheime be minere und för mini Gastfamilie en Läbchueche bache und eine met de Chender. S'geht natürlich hunderti vo Rezept, aber ich bruche immer das vo minere Tante - fende das isch eifach s'feinste (duen denn es Beld ufelade!). Be mer zerst ned secher gsi, ob sie das wärde gern ha, well de Gschmack scho no spezeill isch und gar nöd üblich in Ecuador.
Jedoch händ sis mega fest gärn gha und au d'Chinder und die Ahgstellte em Heim - ha de grad s'Rezept of Spanisch müesse öbersetze.
Met de zwei grosse, hemmer denn de Läbchueche met Schoggi ond Zockerstreusel bestreut.
Erdbeerigonfi.... mhhh
Em August hani met de zwei grösste vom Casa Bordeau Erdbeergonfi gmacht. Es lebet jo vell Chender em Heim und kochet wird Emmer eh de Nacht, drum hend d'Chinder ned so d'Chance eh de Chochi met ah z'packe und drum hend die zwei zum erste mol es Messer eh de Hand gha. Han ehne natürlich keis schafrs geh, aber zum d?erdbeeri schnide hets förig glanget und sie send nocher scho mächtig stolz gsi, dass sie zum erste mol met emerene Mässer gschnette hend und das sogar sehr guet und ohni sich en Finger z'schnide!
De Prozess und s'Resultat gsehnd ehr eh de Föteli.
Mailänderli im Juni, wieso nöd?!
So ich han wieder mol en Aktivität plant und gnosse, diesmol mit de Jugendliche / junge Erwachsene vom Casa Esperanza. Zwar chli unpassend zu de Johreszit, aber super machbar, hani mich für Mailänderli entschiede und mir hend alli zäme guetzlet. S'Resultat isch sehr guet ahcho & d'Guetzli sind ganz schnell alli gässe gsi!! Und s'Rezept wird jetzt au in Ecuador brucht!
Ostere 2018
Da mer bi eus in de Schwiz zu Ostere immer Eier ahmolet und do in Ecuador ziemlich viel Eier gässe werdet, han ich letschd Wuche met de CHinder Eier ahgmolet.
Natürlich möchte ich euch ned vorbehalte, wie es kulinarisch in Ecuador usgseht ah Ostere.
Leider geht's kei Schoggiosterhase, da hani echt vermisst und wirde nechst Johr eine meh ässe...
In Ecuador macht mer en Fanesca, das isch en Fischsuppe (und jo ich hans gärn gha!!).
Ich würds eher als Eintopf beschriebe und enthält folgendi Zuetate:
- Verschiednigi Sorte vo Mais (Zuckermais und Mote - Mote isch en Inka-Mais und sehr sehr fein)
- Bohne döffe natürlich ned fehle
- Erbse
- Linse
- Bacalao (gesalzene, trocknete Fisch, wo zerst paar Stunde ihgweicht wird)
- Kürbisfleisch
- Reis (de geht's en Ecuador au ah jedem Egge und zo jedem Menu / Zmorge, Zmiitag und Znacht)
- Lauch
- in Milch igleiti Erdnüss und Melocco (Knolleart in Ecuador)
Das ganze wird denne gwürzt und lang kochet mit viel Milch, Rahm und Wasser.
Zudem gihts denne wie no meh Bilage, wo mer sini Suppe nach Lust und Lune chan garniere:
- kochti Eier, fritierti Teigtasche (Empanadas), frititerti Kochbanane, Käs, frischi Chrüter, Zwieble, Suppeperle
Wie mer chan useläse, sehr nährhaft und schwer und am Ahfang hani denkt, das chan nie guet sie, vorallem ich wo Fisch ned so liebe, aber ich muess sege es isch sehr fein und halt sehr ufwändig und wird nor eh de OSterwuche de Semana Santa gässe.
Gnueg Text, das ganyze gseht denne so us:
